Homeவிளையாட்டு‘பயம் காட்டிய இருவரும் இவங்கதான்’ பதட்டமாவே இருக்கும்: கவாஸ்கர் தெரிவிப்பு

‘பயம் காட்டிய இருவரும் இவங்கதான்’ பதட்டமாவே இருக்கும்: கவாஸ்கர் தெரிவிப்பு

சுனில் கவாஸ்கர் விளையாடிய காலகட்டத்தில் அபாயகரமான பௌலர்களுக்கு பஞ்சமில்லாமல் இருந்தது. மேற்கிந்தியத் தீவுகளைச் சேர்ந்த மால்கம் மார்ஷல், ஜோயல் கார்னர், மைக்கேல் ஹோல்டிங், ஆண்டி ராபர்ட்ஸ் போன்ற பந்துவீச்சாளர்கள் எப்பேர்ப்பட்ட பேட்ஸ்மேன்களையும் நடுங்க வைக்கும் அளவுக்கு பந்துவீசி வந்தனர்.

அதேபோல், ஆஸ்திரேலியாவின் ஜெஃப் தாமஸ், டென்னிஸ் லில்லி, பாகிஸ்தானைச் சேர்ந்த இம்ரான் கான், இங்கிலாந்தின் இயான் போதம், நியூசிலாந்து அணியைச் சேர்ந்த ரிச்சர்ட் ஹாட்லி போன்றவர்களும் சிறப்பானப் பந்துவீச்சு மூலம் கிரிக்கெட் உலகில் கொடிகட்டி பறந்தனர்.

அந்த காலகட்டத்திலும் சுனில் கவாஸ்கர் சிறப்பாக விளையாடி, சர்வதேச டெஸ்ட் கிரிக்கெட்டில் 10,000 ரன்களை கடந்த முதல் பேட்ஸ்மேன் என்ற வரலாற்றுச் சாதனை படைத்தார்.

இவர் தற்போது இணையதளம் ஒன்றுக்குப் பேட்டிகொடுத்தபோது, தனக்கு எதிராக சிறப்பாகப் பந்துவீசிய இரண்டு பௌலர்கள் குறித்துப் பேசினார். “அதிவேகப் பந்துவீச்சு மூலம் என்னை மிரட்டியவர் என்றால் அது ஜெஃப் தாமஸ்தான்.

அவர் வீசும் பந்தை சுலபமாகக் கணிக்க முடியாது. அதிவேகத்தில் வரும். எப்பேர்ப்பட்ட நிலையிலும் பேட்ஸ்மேனை வீழ்த்தும் ஆற்றல் பெற்றவர். அடுத்து ஆண்டி ராபர்ட்ஸ், நாம் 100 ரன்கள் அடித்து நிலைத்து நின்று விளையாடினாலும் கூட சுலபமாக வீழ்த்தி வருவார்.

அவரது பந்தை நுட்பமாகக் கவனித்து விளையாடியாக வேண்டும். இல்லையென்றால் பெவிலியன் திரும்ப வேண்டியதுதான்” எனக் கூறினார்.

உங்கள் காலத்தில் சிறந்த விளங்கிய எதிரணி பேட்ஸ்மேன் என்றால் யார் எனக் கேட்டபோது, ‘விவ் ரிச்சர்ட்தான். நான் கண்டதிலேயே சிறந்த பேட்ஸ்மேன். அனைவரும் இந்த கருத்தை ஏற்றுக்கொள்வார்கள். கடினமான சூழ்நிலையில் சிறப்பாக விளையாடி, எதிரணியிடமிருந்து வெற்றியைப் பறித்துவிடுவார்” எனத் தெரிவித்தார்.